華東旅行 ~ 杭州古街、湖濱

0係杭州的時間相對黎講較長
行程入面多左好多自由時間
所以我地成日都覺得好似去左杭州好耐咁樣
亦都俾我覺得好似日日都去行西湖
已經行到好悶...哈哈...

最後一天的旅程上午係自由時間
我睇左旅遊書之後就好想去清河坊呢條坊古街度行下
聽說有D 古舊建築，亦有好多得意野賣...





清河坊呢度都幾得意
到處保留住清朝時期的建築
仲有D 特色建築0係附近
最搞笑係我地見到一檔賣人型公仔的
話十五分鐘就搞掂
都唔知係咪真係咁犀利
不過要成百二蚊一個，好似太貴喎~~~

仲有就係有好多古老玩意賣喇~
例如麵粉公仔啦，冰糖葫蘆啦...
有D 我都唔記得lu~
不過有樣勁核突囉....就係食生蝎子喇....
呀~~~~ 頂佢唔順呀!!!
跟住我地見有間古老藥房有咩咩開放俾人睇喎
於是我地又入去行左個圈
入面真係充斥住舊時的賣藥風氣呀~
大家坐低0係度等睇醫師啦~
又有好多人0係度執藥啦~
入面又有好多櫃桶仔啦~
總之入面亂七八糟...好有古代繁華果種景像...

行完古街時間尚早
我地就0係附近公園坐低再"度"下我地下站行程喇~
結果我地決定上去附近的吳山天風
我地0係搵路其間
有個阿婆好好心咁同我地講
話上面冇乜野睇架...仲叫地去睇瀑布添~
到家陣我都仲未搵到條瀑布0係邊
因為我地個地圖唔夠大，所以佢都話唔到俾我地聽0係邊...哈哈~
又問我地有冇去睇龍井問茶啦，雷峰塔啦等等...
不過最後我地都因為時間唔係好夠
冇聽到佢意見，繼續我們的吳山天風行程
上到去，發現要俾錢先入到去城隍閣入面睇風景
入面好大下架...
由於我地行得半個鐘，所以只係0係出面逛下就算lu~

最後行落山果時見到杭州歷史博物館
見仲有少少時間，就入左去行左半個圈喇~
入面主要都係介紹下D 文物
同埋杭州自古以黎的發展咁樣
有D 都幾值得去睇~
有時間都可以去下...

呢個就係舊杭州風貌喇~
個模型做得好細緻架...連入面D 人做緊咩都睇到!!!


行到差不多夠鐘就返酒店
返到酒店執埋D 野check-out 我地就去食飯喇~
不過好gap 囉~
我地返到去果陣有團友話過左時入唔到房
於是叫我地試下...
咦~!!! 我地都係bor~
唯有叫清潔嬸嬸幫我地開返度門啦~~~
(邊有咁0既酒店架，我地又未check-out，點會唔俾我地入去架!!!
更何況應該係十二點鐘check-out 架嘛.....!!!)

0係杭州最後一餐團體餐我地去左同旅行社老闆有關係的一間泰國菜舖頭
今餐係唯一一餐唔係食中國菜的
入面裝修好有熱帶風情味道
仲貼左好多香港明星黎過呢度的相...
好多道菜都係咖喱的
唔算太好食不過都尚可接受
最好食就係D 飯喇~
泰國香米嘛!!!
好耐都冇食過D 咁香咁軟0既飯喇~
呢七日都係食中國米
點都唔及呢D 泰國米咁好食!
食完飯仲有樂隊唱歌同跳舞
我仲俾人拉左出去跳舞添~! :P

食完午餐我地就去行湖濱街喇~
成條湖濱大道係好長架!
導遊俾左成個半鐘我地行
仲話可以遲到添~!
又介紹左D coffee shop 同餐廳俾我地
但係最後我地都係0係湖濱大道行左個幾鐘
好彩今日有太陽，雖然都算係幾凍架!
哈...好耐冇咁悠閒去行公園lu~ (或者叫湖濱啦)
得閒到我地可以唔趕時間咁慢慢行，周圍影下相
去旅行0既日子真係開心喇....
如果可以留0係度多幾日就好lu~


行完湖濱街
我地就搭車去左另一邊的西湖博物館
呢個博物館係新開的
主要係介紹返西湖十景同新十景
再加埋西湖的歷史、西湖附近的建築及發展
仲有西湖的生態等等...
最搞笑係二樓有個藝術展
可惜實在太抽象喇
我地完全估唔到佢係想表達D 乜
最終要睇返個介紹先知每件作品的含意~


天下西湖三十六
原來全中國有成三十六個西湖架!
早知唔駛黎咁遠睇西湖啦~ :p


西湖博物館附近
就係我地呢個行程的最後一個景點"柳浪聞鶯"喇~
呢個公園因為種左好多柳樹而出名
好可惜我地去到果時天都開始黑喇
所以影D 相都唔係太靚~~~

0係呢度逗留的時間並不多
最主要係因為我地要食埋個晚飯先搭車去上機
所以我地匆匆影完相就去搵野食喇~
其實我地都係求其搵間cafe 坐低就叫野食喇~
個商務餐都幾抵呀~
RMB 28 就有一個好精美的"飯盒"
仲平過我壼水果茶呀~!
我地每人叫左個商務餐加多壼茶
咁就夠飽又夠嘆lu~
食完飯嘆完茶...又係上機0既時候喇...
咁就過左七日
真係話長唔長、話短唔短喇~~~

有機會我一定會再次黎杭州渡假0既~




This album is powered by
BubbleShare
- Add to my blog