華東之旅 ~ 繁華上海

離開古色古香的江南
我們走進繁華的大都會-上海

今日成日都落住雨
即使我地搭車由蘇州去到上海
雨都一直沒有停過...
所以我們到達上海新天地的時候
也是下著大雨的...

  
跟香港一樣，上海新天地早在十一月尾已有聖誕佈置了...


上海新天地是一個旅遊熱點
可是...我地入到去商場
入面只係得小貓三四隻
我仲聽到有人用"廣東話"講粗口...-_-" (應是當地的工人)
行完幾層商場
只覺得果度係一座類似又一城之類的商場
並沒有什麼特別...
可能特別在於裡面有台灣的鼎泰豐、香港的采碟軒等等...
新天地商場出面的建築都幾有特色
可惜我地去到果時已經天黑
而且正下著大雨
所以我都冇乜心機影相同行下lu~

跟住好快就去到下一個景點"城隍廟"
同夫子廟一樣
城隍廟唔係一間廟，而係一條街
果度又係有好多野食
例如最出名的南翔小籠包、寧波湯圓、上海糕點等等
因為實在太大雨亦都太凍喇~
我地唯有揀左間寧波湯圓餐廳去試下呢度的湯圓以及小籠包
冇試過南翔果D，所以唔知係咪真係咁好食
不過因為落雨而冇人排隊
我地冇試到都感到有點可惜~
而食湯圓呢間的小籠包
雖然叫左蟹粉小籠，但係就一D 蟹粉味都冇
而且皮較厚
冇香港果D 咁好食!
湯圓就唔錯喇~
雖然碗湯圓入面D 水係清水
一D 味都冇
但係咬開粒湯圓竟然見到有油漏出黎
令到D 水都有味
而且湯圓皮好"in un"
所以好好味~

  


去完城隍廟食小吃
跟住就去食晚飯
嘩...又有小籠包呀~
食到好飽添~
話時話，上海相對於其他華東城市真係唔同D
起碼招呼好少少，唔會越叫越走
不過始終都係大陸城市
服務始終都係差，而且做野係慢好多，D 人又好似唔係好想做咁...

食完晚飯後去左夜遊外灘
上海外灘的知名程度就好似香港的尖沙咀一樣
每個去上海的遊客都會去觀看一下...
幸好夜晚雨勢減弱
所以我地行外灘都唔算太凍太辛苦

  
呢個就係好出名的上海東方明珠電視塔
0係電視搭的另外一邊就係好有古典外國味道的建築
  

導遊帶住我地匆匆行完外灘
就帶左我地去南京路步行街自由活動喇~
我地就試下坐兩蚊的叮叮遊步行街
又行下百貨公司
發覺原來上海街道上的老店舖全部都係用繁體字
感覺好好呀!
我諗可能係因為簡體字係近年先興起
所以以前的人都係用繁體字的
繁體字真係有氣劫好多!

  
兩蚊叮叮，響按果時係一首歌黎架!


最後搵左間到處都有的"上島咖啡"坐低飲野喇~
估唔到cafe d 服務又幾好喎~
同我地去中式酒樓D 服務完全唔同呀!
起碼D 侍應會主動走埋黎問我地想要D 咩
不過就好gap 囉~
因為我壼水果茶要點candle
佢竟然去隔離臺借火...gap!
咁樣去disturb d 客gei~

  
我的新鮮水果茶

由於上飲野的時間實在太耐 (唉~ 呢個就係0係大陸的特色)
所以我地要好快咁飲左杯野之後就走喇~
啊!!!!! 我杯水果茶都未飲晒呀!!!! v.v

今晚果間係最差的三星酒店
其實我又覺得同四星唔差好遠
係D 設施差少少啦~
雖然上海係個不夜城
不過由於我地間酒店離開城區
所以我地都係冇得出去行街lu~~~ wuwu~

0係上海的第二天去左浦東
經過由鄧小平親筆提字的南浦大橋過左對岸的由由區
據說果個地方之所以叫由由
意思係指"田"裡的人有出頭的一日
所以好有紀念價值...

過左浦東果邊的第一站就係東方明珠電視塔對開的黃浦外灘
0係果度就可以望返我地噚晚夜遊果邊的外灘喇~
有舊匯豐銀行啦、和平飯店啦...等等...
仲有近距離觀賞東方明珠電視塔
雖然我都唔覺得佢有乜特別......

  


跟住去左買"天祿"，即貔貅
我地當然唔會咁蠢上當啦~
不過我地諗過好多方法"逃走"都走唔到...嗚~
上海係一個好信風水命理的地方
所以整個上海城其實係一個八卦圖
中間黃浦河成一個S 型
浦東同浦西就成為八卦圖的兩邊
而好多上海的建築都係睇過晒風水先起
仲有好多大型銀行、商業中心都擺兩隻貔貅0係門口
據說上海經濟因此而繁榮~

接著我地就過返去對岸的南京路行街街
噚晚行果條同今朝行果度就唔同喇~
因為今日行果度係前半段
由於係自由時間
所以我地選擇周圍影相
最緊要就梗係要影下舊匯豐啦~
仲有和平飯店
我地0係"上海浦東發展銀行"門前影相果時 (即舊匯豐銀行)
有個上海人仲同我地講話可以入去裡面影
於是我地就膽粗粗咁入去影左幾張之後俾"食蕉"叫我地收埋相機
哈哈~
我地唯有出返去出面繼續影啦~

  


之後去左一間叫"來來永和豆漿"的店舖度食左碗豆花
嘩....四蚊勁大碗呀!
不過唔知係咪冒牌永和黎既~
唔係特別好味~

之後行下南京路
再返去和平飯店去下廁所
哈哈...六星級D 廁所係乾淨D 喎~
0係大陸都好難搵咁乾淨的廁所lu~

行完晒之後我地去左間好大的餐廳食上海本幫菜
冇得特別...
食完餐本幫菜我地就離開上海lu~
告別唯一一站的繁華都市


This album is powered by
BubbleShare
- Add to my blog