ET20 Life Shortcut: 勇闖神州之旅

每年生日都想過得特別D
今年亦不例外
很可惜香港可以玩的地方我地都差唔多玩晒
突然有人提議去廣州睇櫻花
我亦好嚮往去睇櫻花的
所以就咁決定咗喇~~~

好可惜今年天氣太凍
搞到D 櫻花都唔開
咁冇理由去到睇枯枝架嘛
唯有0係去之前嘅一日臨時改行程
最終我地嘅第一次勇闖神州計劃
目的地變咗做深圳東部華僑城!

東部華僑城係近年香港人新興的熱門短線遊目的地
其實有好多旅行團、自由行香港人亦都會到呢個地方玩
呢個景點，似乎亦係為香港人而設
消費貴、豪華、歐洲小鎮風情
完完全全係符合咗香港人快、方便、想享受外國風情嘅概念興建
果度嘅收費完全係「香港價錢，內地消費」
如果係去內地玩，其實一D 都唔化算
不過歐洲小鎮風情真係做到足
置身在內真係有如在歐洲渡假一樣，很relax

講返個行程
由於我地0係行程前一晚先決定去呢度
於是所以車及入場費都book 唔切
唯有取道遠路程，較麻煩的方法去玩
如果我地一早book 定的話
其實旅行社可以代安排專車由九龍塘火車站經沙頭角過境
咁樣就會慳返好多搭車時間
我地今次就由羅湖過關
再0係深圳火車站搭小梅沙的巴士去到大約大梅沙油站落車
行過去東部華僑城的大俠谷區
其實都不過十五分鐘
不過由於我地唔識路
竟然上咗部的士......
的士轉咗個彎，就到咗東部華僑城入口
車程都不過一分鐘....-_-"
早知叫佢車我地去茶溪谷入口啦!!!

因為呢個係一個新開的旅遊景點
所以全區三個谷
只係開咗一個茶溪谷給遊人遊覽
其餘兩個谷都仲整緊
只係開放咗俾我地搭車經過~
大俠谷入口最近旅遊景點大梅沙
所以亦係最多車、巴士會經過的地方
亦變相成為東部華僑城的主要入口

由於華僑城的三個谷係分別建於一個山頭
由大俠谷往茶溪谷係需要跨越一個山頭去山的另一邊
所以0係大俠谷入口的入場費
亦須要添加RM30 的交通費
不過其實呢RM30 都幾抵架~
我地入到去大俠谷
先係見到竹林
跟住就會見到大瀑布
再行上少少，就到咗往茶溪谷的交通開始點
首先我地乘搭小火車上山 (其實係普通的車子做到火車的做型)
然後轉乘中巴上去纜車站搭纜車上雲海谷
果架纜車的原理同山頂纜車的原理一樣
唔同嘅只係呢架纜車好刺激
因為好像坐過山車一樣
扣好安全帶就會呈45度角一直被吊上半空
仲會以高速好快咁吊咗上山頂
不過好彩架纜車係有成一百人一齊搭
如果唔係實嚇死!

上到雲海谷
因為未正式開放
所以只係有小食店同轉車站
跟住我地就再次搭中巴由山頂落返山腳的茶溪谷
呢段中巴車程就比較長喇~

經過一大段精彩刺激的搭車經歷
終於黎到戲肉- 茶溪谷
裡面佈置成為歐洲大鎮一樣
不得不讚美裡面的精心佈置
真係好似去咗歐洲一樣
小屋、河流處處都散發著歐洲味道
我諗呢一點0係香港永遠都做唔到
第一，香港地方太少
第二，香港人實在冇咁嘅心機去佈局陳設
我諗呢個亦都係迪士尼失敗之處
香港的迪士尼只有香港的本土文化
入到去完全感受唔到外國迪士尼果種味道
試問一個香港人
又點會覺得香港文化吸引而入去參觀玩樂呢?!

東部華僑城的吸引之處
就係俾少少錢就可以近近地享受到歐洲風情
入面除咗佈局很像歐洲之外
還請了外國的表演嘉賓到場表演外國歌舞
令歐陸文化小鎮的氣氛再加強了一點
除了本身有很多中式餐廳以外
置身在內就好像置身在歐洲小鎮一樣
感覺得悠閒

老實說，裡面甚麼玩樂設施也沒有
但包保一日一定行唔晒!
入面有一個好似北海道富良野的花田
真實同相片都覺得好靚
不過果日我地時間唔夠
而且亦都陰陰天
感覺上就冇咁靚lu~
所以我地都冇上到去

另外就係去咗搭入園必定要搭的環城火車
呢架火車會0係園區內行一個圈
介紹各區景點同遊樂設施
車程約為半小時
呢架火車真係不可不搭
除咗可以0係半空中欣賞園區內景點之外
仲見到險要山勢、山河景色
有點像探險列車一樣
很有趣
雖然排隊需時很久
搭火車時間亦很長
但可以見埋員工宿舍都係歐洲建築果種悠閒的生活方式
實在覺得值得!

另外，我地入去食咗個已經係tea time 嘅lunch
雖然價錢唔平
但係果間酒樓算係豪華級
服務同食物都算係有水準的
所以都覺得物有所值

我地行到太陽下山
覺得最值得去嘅係入面嘅歐洲風情
真係周圍都有好濃烈嘅歐洲味道
風景亦都好靚
幾值得我地去影相玩樂
不過由於我地走嘅時候亦係大部份遊客走嘅時候
所以排隊搭纜車返大俠谷時等咗好耐
但係亦都體會到夜晚搭纜車落山果種刺激感
嘩! 黑麻麻沖落山果種感覺同上山果時真係冇得比
我真係唔知點形容果種唔知前路有幾遠同埋幾刺激果種感覺
我諗比起過山車會見到下一個刺激點果種感覺還要震撼
因為你無法預計幾時會再衝落山
只係知道纜車會不斷向下行
直至到達終點為止
而且周圍一片漆黑
好似0係森林入面搭緊高速列車一樣
當列車停下來的時候
就係衝出森林的時候喇~

整個東部華僑城之旅
就0係我地將所有交通調轉頭搭一次落返山之後結束
跟住我地黑暗中搵路
好不容易終於出返去公車站
搭返果架我地去程時搭的巴士返去深圳火車站
由於果時已經係八點lu~
我地決定去返三島潮皇度食晚飯
嘩....再次品嘗黃金豆腐煲
真係好好味道呢~
不過D 野食實在太飽太滯了
三碟菜有兩味都有蛋黃
食到我地十級飽!
呢間酒樓幾值得推介
價錢雖然唔平
但係食物水準一流
係返大陸享受的一個選擇!